وقت ذبح بلند آواز سے بسم اللہ پڑھنا ضروری نہیں کیا فرماتے ہیں علمائے دین مفتیان شرع متین مسئلہ ذیل میں کہ ابوبکر نے اپنے سفر عمرہ کی روانگی سے پہلے اپنے گھر پر محفل میلاد ودعوت طعام کا انتظام کیا جس میں مرغا مرغی کو اپنے ہی دو آدمیوں سے ذبح کروایا جس میں ایک حافظ قرآن ہے کچھ لوگوں کا کہنا ہے کہ ذبح کرنے والوں نے کئی مرتبہ زورسے بسم اللہ نہیں پڑھا ہے اورنہ ہی ہونٹ ہلا ہے اور کئی مرغی کا سر تن سے جدا بھی ہوگیا ہے اور سب کا گوشت ایک میں مل گیا ہے اس لئے یہ گوشت کھانا جائز نہیں بلکہ حرام ہے ۔قرآن وحدیث کی روشنی میں جواب دیں کہ کیا کیا جائے ۔ المستفتی : زین العابدین ،سلیا ذومریا گیا الجواب بعون الملک الوھاب :۔ذبح شرعی میں جانور ذبح کرتے وقت اللہ کانام لینا ضروری ہے اس کے بغیر ذبح شرعی متحقق نہ ہوگا اور جانور حلال نہ ہوگا قرآن پاک میں ہے ’’فَكُلُوا مِمَّا ذُكِرَ اسْمُ اللَّهِ عَلَيْهِ إِنْ كُنْتُمْ بِآيَاتِهِ مُؤْمِنِينَ‘‘(سورہ انعام پارہ ؍۸ آیت ۱۱۷)اور اسے نہ کھاؤ جس پر اللہ کا نام نہیں لیا گیا ۔ہاں ! وقت ذبح بلند آواز سےپڑھنا ضروری نہیں صرف اتنی آواز سے کافی ہے کہ آدمی خود سن لے۔صورت مسؤلہ میں اگر ذابح نے بلند آواز سے بسم اللہ نہیں پڑھا تو کوئی حرج نہیں کہ بلند آواز سے پڑھنا مستحب ہے فرض واجب نہیں ۔ذبح کرتے وقت جس مرغی کی گردن کٹ کر الگ ہوجائے اس کا کھانا حلال ہے لیکن اس طرح بالقصد کرنا مکروہ ہے کہ ایسا کرنے میں اسے ضرورت سے زیادہ تکلیف دینا ہے ۔شامی جلد ۹صفحہ نمبر ۴۲۷پرہے ’’ وکرہ کل تعذیب بلا فائدۃ مثل قطع الرأس الخ‘‘ اور بہار شریعت جلدسوم صفحہ نمبر ۳۱۵ پرہے ’’ اس طرح ُذبح کرنا کہ چھری حرام مغز تک پہنچ جائے یا سرکٹ کر جدا ہوجائے مکروہ ہے مگر وہ ذبیحہ کھایا جائے گا یعنی کراہت اس فعل میں ہے نہ کہ ذبیحہ میں لہٰذا اس مرغی کا کھانا جائز ہے ۔واللہ اعلم بالصواب صح الجواب : ڈاکٹر امجد رضا امجد کتبہ: محمد عاشق رضا امجدی